एक दिवस तिच्या घरासमोरच्या शमीम आपाकडे एक बैठक होती. त्यात बाळांची काळजी कशी घ्यायची, लसीकरणाचं महत्त्व याबाबत माहिती दिली जाणार होती. आई आणि भाभी दोघी घरात नसल्यामुळे त्या बैठकीला नौशीन गेली. आपला भाचा आजारी का पडतोय, वेगवेगळे आजार, त्यापासून संरक्षण करणाऱ्या प्रतिबंधात्मक लसी, याविषयी सगळी माहिती तिला मिळाली. तिने येऊन ती घरी सांगितली. मात्र कोणालाच काही पटलं नाही. पहिलंच बाळ असल्यानं भावाला तर लसीकरणाबाबत खूपच भीती वाटत होती. पुढच्या बैठकीला नौशीन आई आणि भाभीला सोबत घेऊन गेली. त्यांचेही गैरसमज दूर झाले. भाऊ मात्र विरोधातच होता. नौशीनने मग आपल्याच घरी बैठक ठेवली. आशा आणि आरोग्य कार्यकर्त्यांनी नौशीनच्या भावाच्या सगळ्या शंका दूर केल्या. लसीकरणामुळे बाळाचं संरक्षण होणार आहे हे त्याला पटलं. त्याची भीती दूर झाली. बाळाची काळजी कशी घ्यायची हे समजल्यानं नौशीनचा भाचा आता सुदृढ होत आहे.

– प्राची उन्मेष, मेघा बुरकुले नाशिक