घरी कांदा चिरतांना आईच्या डोळ्यात टचकन पाणी का बरे आले असेल? या जिज्ञासेपोटी बीड तालुक्यातील कुर्ला जिल्हा परिषद शाळेचा बालवैज्ञानिक ओंकार शिंदे याला त्या दिवशी रात्रभर झोपच आली नव्हती. त्याने शाळेतील विज्ञान शिक्षकांच्या मदतीने आपल्यातील जिज्ञासू वृत्ती आणि बालवैज्ञानिक जागा ठेवून कांदा कापतांना डोळ्यात पाणी येऊच नये म्हणून स्मार्ट चाकू तयार केला. याच त्याच्या स्मार्ट चाकूने दिल्लीत दोन महिन्यापूर्वी झालेल्या राष्ट्रीय विज्ञान प्रदर्शनात पारितोषिक मिळवून दिलं आहे. आता हा लहानगा बालवैज्ञानिक काही महिन्यात आंतरराष्ट्रीय स्पर्धेसाठी जानेवारीमध्ये जपानमधील टोकीओ येथे जाणार आहे. विशेष म्हणजे आता भारत सरकारच्या नॅशनल इनोव्हेशन फाऊंडेशनने त्याच्या स्टार्ट चाकूची पेटेंटसाठी नोंदणी केली आहे. पेटेंट मिळाल्यांनतर भविष्यात कमी वयातील मराठवाड्यातील पहिला शास्त्रज्ञ होणार आहे.