फोटो काढताना, फुलांचं कौतुक करताना ही फुलं कुठली, आपल्या पर्यावरणासाठी ती उपयुक्त आहेत का याचा विचार बहुधा कुणाच्याच मनात येत नसावा. पुण्यातल्या पर्यावरणप्रेमींच्या एका गटाने मात्र या फुलांचे दुष्परिणाम ओळखले. वनस्पती अभ्यासक डॉ.सचिन पुणेकर सांगत होते, “की निरिक्षणातून लक्षात आलं की भारतीय मधमाश्या तसेच परागीभवन करणारे इतर कीटक कॉसमॉसकडे आकर्षित होत आहेत. त्यामुळे निसर्गात इतर वाढणाऱ्या वनस्पतीचे परागीभवन कमी प्रमाणात होऊन त्यांची संख्या लक्षणीय कमी होऊ शकते. शहरातील ही परिस्थिती असतानाच अनेक हौशी पर्यटक, इतर पाळीव जनावरे यांच्यामुळे तसेच गाडीच्या टायरला लागून कॉसमॉस बिया गावाकडे व दुर्गम भागात जात आहेत. काही हौशी गिर्यारोहक त्याचे सिड बॉल करून कॉसमॉसचां प्रसार करत आहेत. शेताच्या बांधावर व गड किल्ल्यांवर देखील त्याची संख्या वाढताना दिसते. जनावरे अशी वनस्पती खाऊन आजारी पडण्याची शक्यता आहे. तृणभक्षी प्राण्यांना अशा अति वाढणाऱ्या वनस्पतीमुळे निसर्गतः अन्न मिळाले नाही तर ते शेतात येऊन शेतीचे नुकसान करतात. त्यामुळे एकूण दुग्ध व्यवसाय व शेतीवर आधारित शेतकऱ्यांचे आर्थिक गणित बिघडू शकते. कॉसमॉसचा एकूण विचार करता त्याचे आर्थिक, सामजिक तसेच पर्यावरणीय असे भीषण परिणाम आहेत.”

– संतोष बोबडे, पुणे