पुढे पक्ष्यांची नावे तोंडपाठ असल्याचा विक्रम करण्यासाठी प्रस्ताव पाठवण्यात आला. त्याने अर्ध्या तासात ही नावं सांगितली. रेकॉर्डमध्ये नाव नोंद झाली तेव्हा त्याला ५०५ पक्ष्यांची नावे पाठ होती, मात्र आता सुमारे ६०० हून अधिक पक्ष्यांची नावं पाठ आहेत. पक्ष्यांच्या विश्वात रमणारा सन्मित आवाजावरून तो पक्षी कोणता आहे हे सहज ओळखतो. वसुंधरेचे वैभव वाढवणार्‍या विविध प्रकारच्या सुंदर पक्ष्यांचे आवाजही त्याला काढता येतात. लॉकडाऊन काळात त्याने अनेक पक्ष्यांचे स्केच देखील काढले आहेत. त्याच्या या छंदासाठी त्याच्या आईवडिलांनी प्रोत्साहन दिले. सन्मितची आई श्रद्धा सांगतात, २०२० मधील लॉकडाउनचा कालावधी आमच्यासाठी नक्कीच फायद्याचा ठरला. यामुळे आम्हाला सन्मितची आवड, त्याला असलेलं ज्ञान आणि आकलन क्षमता या सर्व गोष्टी समजल्या. पूर्वी कामाच्या व्यापात आम्ही कधीच इतकं लक्ष देऊ शकलो नाही. आजकाल ऑनलाईन शिक्षणामुळे मुलं स्मार्टफोनचा जास्त वापर करतात. पण सन्मित पक्ष्यांची माहिती गोळा करण्यासाठी मोबाईलचा वापर करतो. तसेच पक्षी-प्राणी यांच्यावर आधारित पुस्तकांचे वाचतो.