कोकणातून प्रवास करणं हे कायमच आव्हानात्मक आहे. उन्हाळा, पावसाळा अनेक प्रश्न घेऊन येतात. पाणी साचल्यानं  रस्ता बंद होणं आणि भर रस्त्यात बस उभी ठेवावी लागणं, अशी वेळ अनेकदा आल्याचं संपदा सांगते.  दरड कोसळल्यानं अचानक बसचे मार्ग बदलले जातात, अशा वेळी संयमानं काम करावं लागतं, असे अनुभवाचे बोल संपदा आता अभिमानानं सांगते.बसमधून वर्षानुवर्षे प्रवास करणाऱ्या प्रवाशांशी आता तिची चांगली गट्टी जमली आहे. डॉक्टर-इंजिनिअर होऊन पुण्या-मुंबईत स्थिरावलेली  अनेक मुलंमुली  कोकणात येताना संपदाला ओळख देतात. ‘तुमच्या सोबत आम्ही रोज प्रवास करायचो, आम्ही चुकलो तर तुम्ही हक्काने ओरडत होतात, म्हणूनच आज यशस्वी होऊ शकलो’ असं सांगतात तेंव्हा संपदा भरून पावते.

— भाग्यश्री मुळे